اسلام آباد: پاکستان تحریک انصاف (پی ٹی آئی) نے امریکی نیوز ویب سائٹ پر سفارتی سائفر شائع ہونے کے بعد ایک بار پھر ایک اعلیٰ اختیارات پر مبنی عدالتی کمیشن کے قیام کا مطالبہ کردیا۔

پارٹی کی جانب سے جاری کیے گئے اعلامیہ میں اس بات پر زور دیا گیا کہ سائفر سے متعلق رپورٹ شائع ہونے سے چیئرمین پی ٹی آئی عمران خان کے بیانات کی صداقت مزید مستحکم ہوجاتی ہے۔

مزیدپڑھیں: اگر سائفر سچ ہے تو یہ ایک بڑے جرم کے مترادف ہے، وزیراعظم

پی ٹی آئی کی جانب سے کہا گیا کہ عدالتی کمیشن سائفر کے معاملے کی مکمل تحقیقات کرے اور بعد ازاں اس کے نتائج کو منظر عام پر لائے۔

پی ٹی آئی کے ترجمان نے کہا کہ رپورٹ کے انکشافات سے ظاہر ہوتا ہے کہ عمران خان کی حکومت کا تختہ تحریک عدم اعتماد کے ذریعے الٹایا گیا جو ایک سازش تھی۔

واضح رہے کہ امریکی ویب سائٹ دی انٹرسیپٹ نے سائفر کے متن کو شائع کرتے ہوئے خبر میں لکھا کہ اس سائفر سے چیئرمین پی ٹی آئی کی حکومت کو گرانے کے پیچھے امریکی دباؤ کارفرما نظر آتا ہے کیونکہ امریکی سفارت کار نے یہ بیان دیا تھا کہ اگر عمران خان کے خلاف تحریک عدم اعتماد کامیاب ہوگئی تو سب کچھ معاف کردیا جائے گا۔